احصل على تحديثات في الوقت الفعلي مباشرة على جهازك ، اشترك الآن.
_عيطة مهمومة _
نتي برمة وكسكاس لحومة
ونتا سمكة يا ضعيف نفس يا الدمدومة
سبة ولا قبة باش تعمرو الجيوب
وانا بنااادم معندي سومة
عندي ميزان لقوام المهدومة
مشرفني الله عندو محبوب
يا عبيد اللومة
را الكلمة المسمومة
تحفر فالقلوب
يا لفام المجحومة
را الوعود الملغومة
كتبت لمقال معطوب بالمقلوب
يا العقول المزحومة
الى الحروف مردومة
تسناو ففكار الشهوب
بعيطة مهمومة
يا ديك الرباعة المنغومة
الى الشعوب مكلومة
تسناو فياق المغلوب
يا القلام المحكومة
را الوجوه معلومة
لاش زايدين كذوب
يا ديك لعيوط المدمومة
را الحقوق مردومة
ولاش المعنى مزروب
روايح البدخ مشمومة
عباد من لكسرة محرومة
وغيرتو النعمة و الحبوب
عيوب القوام محمومة
فعين شاشة ملمومة
معروضة فهم مزروب
بعيطة مهمومة
يا لبدان المزطومة
بلا معنى مجدومة
وخلاصك محسوب
يا ديك السبورة المشؤومة
خرجتي الشبان مضيومة
من الزمان مرهوب…
التكليخة عل لجباه مخدومة
طريقهم عوجة معدومة
ولي فاق بالقفل مضروب
يا السواكن المهمومة
عجي هاد الحال فقصايد منظومة
ساكنة مجدوب
تغياب لبال حشومة
ولا حروفنا غير هبال ومعانيها موهومة
تصرف قوالنا دنوب
بوهالي مبغا يتوب رغم لومة
من هاد النظرة و الحضرة
وهاد الهضرة مخدومة
تزعزع حارق القلوب
بعيطة مهمومة
يا غزة يا المرشومة
بلدهان لوقات مخدومة
وسر معند الله موهوب
على الرجاال المرحومة
لي بتقا ملهومة
نجونا بدعا قبل الغروب
ترجع البسمة مرسومة
والنظرة مفهومة
تعالج هاد الكروب
و الحقوق بالعدل مقسومة
عقول العلم مقيومة
ولمقال بالحق مكتوب
تبقى لعدا مصدومة
وتطفى هاد الحروب
بقلم : طارق أمغار