احصل على تحديثات في الوقت الفعلي مباشرة على جهازك ، اشترك الآن.
_مصطفى ختراني _
قصيدة زجل للزجال عبدالجليل الخيشبي
شلا وشلا
واشحال من زلة
شي تابع المرقة
او شي طامع فالغلة
اوشي هاز السلة
اوشي باغي يتفلا
او جاب لينا العلة
او شي بدل الملة
او قطع امعانا الورقة
او قال لينا تهلا
او شي خلانا اخلا
افحال شي نخلة
وسط صحرا
من قلة الما فوحلة
هي وجريدها فمحنة
وثمرها ما ابغا يدلى
او فين اسمن القلة
او واش فيه شي ملحة
ولى شد شي منحى
او مال شهد النحلة
اعلينا اغبر واخفا
را ما ابقى ما يتخبا
أياربي آش هاذ الحصلة
امعا اقشور البصلة
فكل كيتنصل نصلة
ما عرفناها واش ولات خصلة
او خاصنا انديروها خرصة
فاشحال من فعلة
تابعاها نعلة
فارخف الوثرة
باش تزيان النغمة
واتعم علينا النعمة
وتسهال الدغمة
الهم اشربناه بجغمة
واحرارت اللقمة
الدرهم صار كيف النجمة
الاغلبية تابعة ضوو فالسما
حتى هزنا الما
أو فين عصا موسى
تحل لينا المنجا
ولا اغنص فلجة
تبعتي اطريق عوجة
وصرتي فرجة
و احلامك مرجة
هابطة درجة بدرجة
الزهر اعصرناه بمطرقة
من بعد ما دقيناه دقة
وينقط نقطة بنقطة
ابغينا نتجمعو على اساس
نبنيو الساس
وانعودو السواري
واجمعنا لمداري
وقلنا باركا من لعب الدراري
فواقيلا عجباتنا ضامة والكاري
والتنقاز علعتابي
هادشي باش ربي ابلاني
ولي فية ما هناني
شوكة من الصغر
والهم اوصل للمنخر
والصبر كايضبر
تمشي ما توصل
تهضر تحصل
وتسكت اتقابل النصل
اسفيهنا دصر
ولقلبنا اعصر
وصار ليه ايقطع وينشر
وبالملحة ليه يجبر
فباش ابغيتوني نفخر
ويد فالما ويد فالجمر
فشي جيبو اعمر
وشي رزقوا تفحم وتجمر
او وجهو اخسر
او سماوه الزمر